Os programas PequeVerán, Música&Románico e Son&Serán enchen de xoves ao sábado as prazas e igrexas do municipio con tres propostas tan diferentes como irresistibles
Tres días, tres formatos e un municipio que non para. Tomiño arranca xullo cunha semana cultural que vai do humor máis desbordante ao recollido dunha igrexa románica, pasando pola festa e as gaitas dunha praza chea de xente.
O xoves 2 de xullo, o programa PequeVerán trae á Praza Pintor Antonio Fernández de Goián o espectáculo A Vida Tola, de Pajarito. Clown, escapismo, humor e interactividade para todos os públicos, nun show no que Pajarito transforma cada recuncho do espazo nun xogo. A cita é ás 19.30 horas e a entrada é libre.
O venres 3 de xullo chega a quenda de Música&Románico, a proposta que combina o encanto do patrimonio histórico co poder evocador da música para crear experiencias únicas. Esta primeira cita da tempada acollerá o concerto do dúo KeiCos, formado por Arsenio Keilin ao violonchelo e piano e Santi Costas á guitarra, que fusionan música tradicional e clásica con arranxos propios. A actuación será ás 20.30 horas na Igrexa de Santa María de Tomiño. O programa continuará durante o verán con máis concertos nas igrexas románicas tomiñesas, consolidándose como unha das apostas culturais máis singulares do municipio.
O sábado 4 de xullo a festa pecha a semana coa primeira actuación do programa Son &Serán: o Festival Vaideson, organizado pola Asociación Cultural Escola de Gaitas e Danza Virxe do Alivio, un festival que naceu coa vocación de mesturar estilos musicais e promover a cultura musical galega en todos os seus ámbitos. A cita é ás 21 horas na Praza do Seixo de Tomiño.
Toda a programación é de acceso libre e gratuíto.
The post Xullo estréase en Tomiño con música e risas para todos os públicos appeared first on Concello de Tomiño.