O Nadal chega a Tomiño cunha explosión de luz, cor e animación que conquistará ao público. O vindeiro domingo, 8 de decembro, a fachada do Concello converterase no escenario dun grande espectáculo de videomapping, unha técnica visual innovadora que proxectará imaxes e animacións sobre a superficie da Casa Consistorial, creando efectos de luz e movemento que farán as delicias de todo o público asistente.
“Queremos que o Nadal comece por todo o alto en Tomiño, ofrecendo á veciñanza un espectáculo innovador, moi vistoso e único, xa que está totalmente personalizado e adaptado ao noso Concello”, destaca a alcaldesa, Sandra González. A rexedora convida a toda a veciñanza a achegarse e vivir en primeira persoa este evento tan especial “que será moito máis que unha proxección: será unha experiencia visual espectacular que encherá de ilusión a Praza do Seixo”.
O espectáculo, que comezará ás 20.00 h e será totalmente de balde, combinará luces, cor e animacións para transformar a fachada do Concello nun lenzo que transportará ao público ao espírito navideño. Haberá tres pases do espectáculo, ás 20.00, ás 20.30 e ás 21.00 horas.
Por outra banda, o tradicional acendido das luces de Nadal, tivo lugar o pasado día 1 de decembro, e iluminarán as rúas da vila ata Reis, como é habitual cada ano.
The post O Nadal ilumínase en Tomiño cun grande espectáculo de videomapping appeared first on Concello de Tomiño.