Estas andainas guiadas, de balde e sen inscrición comezan este venres 12 cun percorrido polo río da Pedra e o domingo 14 cunha coa ruta da Pedra Furada
O Concello pon en marcha esta fin de semana ‘Tomiño en marcha’, unha nova iniciativa impulsada ao abeiro da Axenda Impacto Saudable coa que a veciñanza poderá descubrir de forma guiada as sendas naturais do municipio a través de andainas gratuítas, abertas a todos os públicos e sen necesidade de inscrición previa.
O programa nace coa vontade de fomentar hábitos de vida saudables, promover o contacto coa natureza e dar a coñecer a riqueza paisaxística e patrimonial do concello, aproveitando a recente posta en valor dunha rede de rutas que xa pode consultarse e descargarse de balde a través das plataformas especializadas Wikiloc e Komoot.
A primeira cita será este venres 12 de xuño coa Ruta do Río da Pedra, un percorrido circular de case 4 quilómetros, cunha duración aproximada dunha hora e dificultade baixa. A saída terá lugar ás 20.30 horas desde a Área Recreativa da Pedra, nunha proposta ideal para gozar da natureza ao solpor.
A programación continuará o domingo 14 de xuño coa Ruta da Pedra Furada, unha andaina circular de preto de 9 quilómetros, cunha duración estimada de dúas horas e media e dificultade media-alta. Neste caso, a saída realizarase ás 09.30 horas desde o Parque de Figueiró.
A través destas andainas guiadas, as persoas participantes poderán coñecer de primeira man os recursos naturais, paisaxísticos e culturais que agochan as diferentes parroquias do municipio, ao tempo que comparten unha experiencia saudable e accesible ao aire libre.
O Concello anima á veciñanza a sumarse a esta iniciativa e a aproveitar esta oportunidade para descubrir ou redescubrir recunchos singulares de Tomiño nun ambiente participativo e próximo.
‘Tomiño en marcha’ continuará durante os meses de xuño e xullo percorrendo progresivamente as distintas rutas do municipio, consolidándose como unha proposta que combina natureza, benestar, deporte e coñecemento do territorio.
The post Tomiño ponse en marcha coas súas dúas primeiras rutas polas sendas naturais do municipio appeared first on Concello de Tomiño.