No pleno celebrado co gallo do Día Mundial da Infancia este 20 de novembro alumnado dos centros educativos de Tomiño defenderon propostas sobre seguridade e benestar dixital
A infancia e mocidade de Tomiño toma a palabra. Máis de cen nenos e nenas de primaria e de secundaria dos centros educativos do municipio foron os protagonistas do Pleno Infantil, celebrado un ano máis coincidindo coa celebración do 20 de novembro, Día Mundial da Infancia, e no que o Concello dá un paso máis para que Tomiño siga sendo un lugar no que crecer con liberdade, protección e voz propia.
Foi unha sesión dedicada integramente aos dereitos dixitais na que a rapazada do CEIP da Sobrada, CEIP Pedro Caselles, CEIP de Tebra, CEIP de Barrantes, CEIP Pintor Antonio Fernández de Goián e do IES Antón Alonso Ríos que converteron este pleno nun espazo vivo, diverso e participativo que contou tamén coa presenza de representantes das ANPAS e da Corporación municipal.
A temática non foi escollida ao azar, senón que recolleron a estela do debate e traballo sobre os dereitos dixitais feito polos integrantes do grupo de participación infantil e xuvenil de Tomiño, Voces Novas, no Encontro Autonómico celebrado hai unhas semanas en Nigrán e que este venres levarán de novo ao Parlamento para fondar sobre as propostas elaboradas colectivamente.
Durante o pleno, os escolares expuxeron demandas claras: máis formación para persoas adultas como familia e profesorado e incluso para elas e eles mesmos e máis información accesible desde as propias redes do Concello. Ademais, compartiron compromisos persoais para facer da esfera dixital un espazo seguro, responsable e respectuoso.
A alcaldesa de Tomiño, Sandra González, celebrou a madurez e valentía das intervencións: “Volvemos comprobar que a infancia non só ten voz, senón que ten criterio, propostas e unha mirada limpa que deberiamos escoitar sempre. Falan con claridade do que necesitan e tamén do que están dispostos a asumir. Iso é participación real e así constrúese cidadanía”. Tomiño, Cidade Amiga da Infancia e Adolescencia dende 2019, reafirma cada ano o seu compromiso coa cativada e a mocidade, “porque cando estamos coidando ás nosas nenas e nenos estamos construíndo unha sociedade máis xusta, máis solidaria e máis feliz”.
The post A infancia tomiñesa debate sobre os seus dereitos dixitais appeared first on Concello de Tomiño.