O Concello aproba en pleno as bases dunha convocatoria coa que se achegarán 55.500 euros para mellorar ou substituír sistemas de depuración autónoma en vivendas ata finais do vindeiro ano
Coincidindo co Día Mundial do Saneamento, o Tomiño vén de aprobar en pleno as bases dunha nova convocatoria de subvencións destinada a mellorar os sistemas de depuración autónoma das vivendas do municipio, unha iniciativa que reforza o compromiso do Concello coa protección ambiental e o benestar veciñal.
O Concello investirá 55.500 euros nestas axudas distribuídas en dúas liñas de actuación para levar a cabo ata o 31 de outubro de 2026, unha para melloras ou instalación de novos sistemas de depuración autónoma e outra para a elaboración da documentación técnica necesaria para executar as obras.
Segundo explicou a alcaldesa, Sandra González, “trátase dun paso importante para seguir avanzando nun modelo de xestión sostible, apoiando ás familias que non contan con conexión á rede municipal de saneamento e que precisan modernizar as súas instalacións para garantir un funcionamento axeitado e respectuoso co medio ambiente”.
As axudas permitirán cubrir ata o 80% dos gastos subvencionables, cun límite de 2.500 euros para actuacións de mellora ou substitución do sistema, e de 600 euros para a documentación técnica asociada. Ademais, poderán ser beneficiarias todas aquelas persoas propietarias de vivendas unifamiliares que non teñan a obriga de conectarse á rede municipal de saneamento, tal como recolle o regulamento vixente.
A rexedora subliñou tamén que “esta liña de subvencións responde ás necesidades reais das parroquias e núcleos nos que aínda non é posible a conexión ao sistema municipal, garantindo condicións de salubridade e un impacto ambiental mínimo”. González destacou a vontade do goberno local de facilitar ao máximo a tramitación: “Queremos que a veciñanza poida acceder a estas axudas con garantías, transparencia e apoio técnico en cada paso do proceso”.
As solicitudes poderán presentarse a través da sede electrónica ou no Rexistro Xeral do Concello, no prazo dun mes a partir da publicación oficial do extracto da convocatoria no Boletín Oficial da Provincia.
The post Tomiño activa unha liña de axudas para modernizar a depuración nas vivendas appeared first on Concello de Tomiño.